MegaNews.am-ին է դիմել մի քաղաքացի՝ նշելով՝ «Ռոսսիա մոլ» առևտրի կենտրոնի ավտոկայանատեղիում մեքենան կայանելու համար իրենից 200 դրամ վճարում են պահանջել։ Երբ քաղաքացին պահանջել է, որ իրեն ՀԴՄ կտրոն տրամադրեն, տրամադրվել է ավելի վաղ (24 րոպե առաջ) տպված կտրոն, այսինքն` հին կտրոն, որից ինչ-որ քաղաքացի, հավանաբար, հրաժարվել է: Ստացվում է` Խաչատուր Սուքիասյանին պատկանող մոլում ջանում են հնարավորինս քիչ կտրոն տպել ու քաղաքացիներին տրամադրել: Մի փաստ ևս արձանագրենք. մոլի ավտոկայանատեղիում ավտոմեքենան կայանելու համար վճար պահանջելը մեր երկրում նորություն է, մյուս մոլերում գնումներ անողներն անվճար կայանում են իրենց ավտոմեքենաները:
Հենց այսօր մեր թղթակիցը հարցում է կատարել մի քանի մոլերի այդ փաստը վստահաբար իմանալու համար, և, իսկապես, մյուս մոլերում նման վճարում գոյություն չունի: Մեր լրատվամիջոցը մեզ տրված մասնագիտական լիազորությունների սահմաններում անելու է ամեն ինչ, որպեսզի որևէ տնտեսվարող իրեն արտոնյալ չզգա, ինչի պատճառով կարող են տուժել մեր երկրի քաղաքացիները։
Meganews.am-ի թղթակիցը հեռախոսակապ հաստատեց ՀՀ պետական եկամուտների կոմիտեի տեղեկատվության և հասարակայնության հետ կապերի բաժնի ղեկավար Լուսինե Մկրտչյանի հետ։ Վերջինս նշեց՝ մեր հայտնած տեղեկությունը և տրամադրած փաստերը կտրամադրի վերահսկղության աշխատակիցներին, ստուգումներ կկատարվեն, մասնագետները հենց իրենք կգնան այնտեղ, ավտոմեքենա կկայանեն և կտեսնեն՝ իրականում ինչ է կատարվում, և եթե խախտում արձանագրվի, գործ կկազմվի, կակտավորվի ու տնտեսվարողը պատասխանատվություն կկրի տվյալ անօրինականության համար։