Գիշերը ժամը 4:00-ից մոտ 200 ոստիկան շրջապատել են Եղեգնուտը եւ փակել նրա գլխավոր ճանապարհը: Այս մասին ֆեյսբուքյան ուղիղ եթերով ասաց Եղեգնուտի բնակիչ Սմբատ Մկրտչյանը:
«Գիշերվանից մեր գյուղի ճանապարհները 4 կողմից փակ է։ Մարդկանց նույնիսկ չի հետաքրքրում ՝ սահմանում ինչ է կատարվում սահմանը թողել եկել մեր գյուղի ճանապարհներն են փակել»,-ասաց նա:
Մկրտչյանը հավելեց, որ ոստիկանական մեքենաներով են փակել գյուղի գլխավոր ճանապարհը:
Վաղ առավոտից գյուղում բազմաթիվ բնակիչներ են հավաքվել պարզելու՝ ինչն է խնդիրը: Գյուղացիները փակել են գյուղապետարանի շենքը եւ թույլ չեն տալիս, որ նախկին գյուղապետը, որ վերականգնվել է իր պաշտոնում դատարանի որոշմամբ մտնի շենք: «Մենք մեր գյուղապետին ենք ուզում, ո՞ւր է նա, թողեք աշխատի»,-ասացին գյուղացիները:
Ոստիկանները խնդրեցին ազատել գյուղապետարանի շենքի մուտքը, սակայն խնդրանը մնաց առանց կատարման: Որոշ ժամանակ անց ոստիկանները փորձեցին ուժով հետ հրել մարդկանց, քաշքշուկ սկսվեց:
Նշենք, որ Վերաքննիչ դատարանի որոշմամբ, համայնքապետի ներկայիս պաշտոնակատար Ռազմիկ Մկրտչյանը պետք է լքի իր պաշտոնը, իսկ նրա փոխարեն այդ պաշտոնում վերականգնվի նախկին համայնքապետ Ռազմիկ Մարգարյանը։
Բողոքի ակցիաների միջոցով եղեգնուտցիները ստիպել էին Ռազմիկ Մարգարյանին 2018-ի հուլիսի 2-ին հրաժարական տալ։
Նա էլ դիմել էր վարչական դատարան՝ համայնքապետի պաշտոնակատարի պաշտոնավարումը դադարեցնելու եւ իրեն նախկին պաշտոնում վերականգնվելու հայցով։
