Հայաստանը շարունակում է առաջատարը լինել տարածաշրջանում 1 մլն շնչի հաշվով կորոնավիրուսով վարակման, ինչպես նաև հիվանդությունից մահացության ցուցանիշներով:
Ինչպես հետևում է worldometers.info կայքի՝ պարբերաբար թարմացվող տվյալներiց, հուլիսի 7-ի դրությամբ՝ 1 մլն բնակչության հաշվով կորոնավիրուսով վարակման ցուցանիշը Հայաստանի համար կազմել է 9882, մահացության ցուցանիշը՝ 170:
Ի դեպ, հարևան Իրանում այսօր գրանցվել է կորոնավիրուսից մահվան մեկօրյա ռեկորդային ցուցանիշ. երկրում մահացել է 200 հիվանդ:
Վերջին տվյալների համաձայն՝ տարածաշրջանում 1 մլն շնչի հաշվով կորոնավիրուսով վարակման ցուցանիշներն ունեն հետևյալ տեսքը.
1. Հայաստան - 9882
2. Ռուսաստան – 4757
3. Իրան - 2925
4. Թուրքիա – 2465
5. Ադրբեջան – 2108
6. Վրաստան – 240
Տարածաշրջանում 1 մլն շնչի հաշվով կորոնավիրուսից մահացության ցուցանիշներն այսպիսին են.
1. Հայաստան - 170
2. Իրան – 142
3. Ռուսաստան – 72
4. Թուրքիա – 62
5. Ադրբեջան – 26
6. Վրաստան – 4
Հիշեցնենք, որ Հայաստանում հուլիսի 7-ին հաստատվել է կորոնավիրուսով վարակվելու 349, մահվան՝ 17 նոր դեպք․ վարակվածների ընդհանուր թիվը 29 285 է, մահվան դեպքերինը՝ 667:
Մեկ օրում առողջացածների թիվը 605 է, ընդհանուր առողջացածներինը՝ 16907, փաստացի բուժվողներինը՝ 11711 (մեկ օրում նվազել է 273-ով):
Նշենք նաև, որ կայքի տվյալների համաձայն՝ Հայաստանը 1 մլն բնակչության հաշվով կորոնավիրուսով վարակման ցուցանիշով ներկա պահին գտնվում է 9-րդ հորիզոնականում: Մեզ նախորդում են Չիլին, Բահրեյնը, Կատարը, Ֆրանսիական Գվինեան, Անդորան, Սան Մարինոն, Վատիկանը, Քուվեյթը: