Այսօր Ազգային ժողովում խորհրդարանական լսումների ժամանակ «Իմ քայլը» խմբակցութան պատգամավոր Նազելի Բաղդասարյանը պաշտպանիչ դիմակի գների վերաբերյալ հարց ուղղեց Տնտեսական մրցակցության պետական հանձնաժողովի նախագահ Գեղամ Գևորգյանին։
«Շատ դեպքերում անհարկի շահարկումներ են տեղի ունենում և այսօրվանից արդեն դիմակների կրումը, բաց տարածքներում՝ առկայությունը վերահսկվելու է»,-ասաց նա և հարցրեց, թե արդյո՞ք այստեղ ոչ բարեխիղճ մրցակցությունը տեղ ունի:
Գեղամ Գևորգյանն ասաց, որ ուսումնասիրությունն ավարտել են և վաղը հանձնաժողովի հերթական նիստի օրակարգում ընդգրկված է գերիշխող դիրքի չարաշահման և հակամրցակցային համաձայնության փաստի հիմքով վարույթի հարուցումը:
Նազելի Բաղդասարյանը նշեց, որ Երևանում այսօր արդեն 100, 150 դրամով կարելի է ձեռք բերել դիմակ, սակայն մարզերում անբարեխղճության տարրը կա և հատկապես ոչ թե դեղատներում, այլ խանութներում զգալիորեն թանկ են: Գեղամ Գևորգյանը նշեց, որ մարզերում գների թանկացումը պայմանավորված է նրանով, որ երրորդ միջնորդներն են հայտնվում: Նա նշեց, որ պարետատան երեկվա նիստին քննարկել են դիմակներն ավտոմատ ապարատների միջոցով հանրային վայրերում վաճառելու հարցը, որի արդյունքում դիմակի գինը մոտ 100 դամով կիջնի, քանի որ միջնորդները դուրս կգան։
