Covid-19 համաճարակը շրջադարձային ժամանակահատված կդառնա, որն ընդմիշտ կփոխի աշխատանքի և ուսուցման ֆորմատը, The Verge-ի փոխանցմամբ՝ հայտարարել է Microsoft 365 բաժնի ղեկավար Ջարեդ Սպատարոն։
2020թ․ մարտի ամսին Microsoft Teams կորպորատիվ մեսենջերի պահանջարկը բարձրացել է ամբողջ աշխարհում։ Մեկ շաբաթվա ընթացքում օրական օգտատերերի քանակն ավելացել է` 32 մլն-ից հասնելով 44 մլն։
Դեռ մարտի 31-ին ընկերությունը ֆիքսել է նաև Teams-ում զանգերի ռեկորդային տևողություն՝ 1 օրվա ընթացքում 2․7 մլրդ րոպե։ Նախորդ ռեկորդը սահմանվել էր մարտի 16-ին՝ 900 մլն րոպե, ինչը 200 տոկոսով պակաս է վերջինից։
Բացի այդ, բարձրացել է համակարգիչների և նոթբուքերի պահանջարկը, քանի որ մարդիկ հասկացել են՝ iPad-ը հարմար չէ հեռավար աշխատանքի համար, ասել է Սպատարոն։
Նա նաև նշել է, որ իր կանխատեսմամբ՝ համաճարակից հետո էլ հեռավար աշխատանքը կպահպանվի։ Օրինակ՝ Չինաստանում կարանտինից հետո Microsoft-ը ֆիքսել է Teams մեսենջերի օգտագործման կրկնակի աճ։
«Այն, ինչ հիմա կատարվում է Չինաստանում և Սինգապուրում, կարելի է անվանել ժամանակի մեքենա։ Հասարակության մեջ գործում են նոր սահմանափակումներ և աշխատանքի նոր ֆորմատներ։ Համաճարակի ավարտից հետո կհայտնվի նոր նորմա՝ մենք դեռ երկար կօգտագործենք այս նոր գործիքները։»,- ասել է Սպատարոն։
