Ես էլ ձեր նման տեղեկացել եմ մամուլից. պաշտպանը՝ Հրայր Թովմասյանին գաղտնալսելու լուրի մասին


Ես էլ ձեր նման տեղեկացել եմ մամուլից. պաշտպանը՝ Հրայր Թովմասյանին գաղտնալսելու լուրի մասին
Հունվար 23 00:01 2020

ՍԴ նախագահ Հրայր Թովմասյանին գաղտնալսելը եւս մեկ քայլ է, որ Սահմանադրությամբ անձեռնմխելիությունով օժտված անձի իրավունքները խախտվում են։ Այս մասին այսօր՝ հունվարի 22-ին, լրագրողների հետ զրույցում ասաց Թովմասյանի պաշտպան Ամրամ Մակինյանը, գրում է News.am-ը։

Նշեն, որ մամուլում լուրեր են տարածվել, թե ՀՔԾ-ն օրինական հիմքերով գաղտնալսում է ՍԴ նախագահին։

Պաշտպանն ասաց, որ այդ տեղեկություններին ծանոթացել է մամուլից. «Դեռեւս քննարկում ենք, թե ինչպես ենք արձագանքելու, բայց մոտ ապագայում, անպայման, արձագանքելու ենք։ Ես էլ ձեր նման տեղեկացել եմ մամուլից»։

Մակինյանն ասաց, եթե օրինակ՝ ՀՔԾ-ն գաղտնալսում է ՍԴ նախագահին, ապա դա անձեռնմխելիության խախտում է. «Եթե վերացականորեն ընդունենք, որ այդ գործողությունն իրականում կատարվել է, ապա դա փակ ռեժիմով է կատարվում, մեր պաշտպանական կողմն, իհարկե, մասնակից չի լինում այդ դատական նիստին։ Բացասական եմ վերաբերում այդ ամենին որպես անձ, որպես իրավաբան եւ որպես պարոն Թովմասյանի շահերի պաշտպան»։

Հիշեցնենք, որ ՀՀ ՍԴ նախագահ Հրայր Թովմասյանին մեղադրանք է առաջադրվել 2019 թվականի դեկտեմբերի 27-ին՝ ՀՀ քրեական օրենսգրքի 308-րդ հոդվածի 2-րդ մասի հատկանիշներով՝ պաշտոնեական լիազորությունները չարաշահելու համար։ Նրան որպես մեղադրյալ ներգրավելու որոշումը կայացրել էր ՀՀ գլխավոր դատախազը՝ դեկտեմբերի 26-ին, նույն օրը, երբ ՀՀ նախագահ Արմեն Սարգսյանը ստորագրեց Սահմանադրական դատարանի դատավորներին վաղաժամ թոշակի ուղարկելու մասին օրենքը։



loading...