Հայաստանի Հանրապետության Գեղարքունիքի եւ Ֆրանսիայի Հանրապետության Իզերի մարզերի միջեւ ապակենտրոնացված համագործակցությունը զարգացնելու եւ նոր հուշագիր ստորագրելու նպատակով նոյեմբերի 5-8-ը Իզերի Դեպարտամենտալ խորհրդի հրավերով Գրենոբլ է մեկնել Գեղարքունիքի մարզպետ Գնել Սանոսյանի ղեկավարած պատվիրակությունը: Ինչպես «Արմենպրես»-ին տեղեկացրին Գեղարքունիքի մարզպետարանի տեղեկատվության եւ հասարակայնության հետ կապերի բաժնից, նոյեմբերի 6-ին պատվիրակության ներկայացուցիչները հյուրընկալվել են «ԱՖՐԱՏ» տուրիստական ընկերությունում, որտեղ կազմակերպության տնօրենը և ներկայացուցիչները խոսել են «ԱՖՐԱՏ»-ի առաքելությունների, քայլարշավային երթուղիների, բնապահպանական տուրիստական գործունեության,Վերկորի բնական մարզային պարկի դերի մասին: Այնուհետ կազմակերպվել է քայլարշավ ու մտքերի փոխանակում տուրիստական ծրագրերի պատասխանատուների մասնակցությամբ: Գեղարքունիքի մարզի պատվիրակությունը հյուրընկալվել է նաեւ Կուվի հյուրատանը, որտեղ քննարկվել են տուրիզմի ոլորտին առնչվող մի շարք թեմաներ:
Այցելության վերջին կանգառը եղել է Վերկորում՝ Օտրան եւ Մեոդր համայնքների տուրիստական գրասենյակներում: Նոյեմբերի 7-ին Գեղարքունիքի պատվիրակության ներկայացուցիչները մասնակցել են «IRAPA» տուրիստական հարթակի հանձնախմբի ժողովին, համատեղ քննարկել տուրիզմի ոլորտում կողմերի միջեւ իրականացված եւ նախատեսվող անելիքները: Հանդիպմանը ներկա են գտնվել նաեւ Վիենի եւ Գրենոբլի քաղաքապետարանների պատասխանատու աշխատակիցներ, Սեւանի քաղաքապետարանի պատվիրակության անդամներ՝ քաղաքապետ Սարգիս Մուրադյանի գլխավորությամբ:
Նույն օրը Գեղարքունիքի մարզի պատվիրակության անդամները հանդիպում են ունեցել ֆրանսիական «Բժշկական օգնություն և զարգացում» ասոցիացիայի անդամների հետ, որի ընթացքում կողմերն անդրադարձել են Գեղարքունիք-Իզեր ապակենտրոնացված համագործակցության շրջանակներում 2019 թվականին իրականացվող ծրագրին, խոսել 2020 թվականի ծրագրային հեռանկարների մասին:
Օրն ավարտվել է եւս մեկ հանդիպմամբ, որը կայացել է «Հայաստան. փոխանակում եւ աջակցություն» ասոցիացիայի ներկայացուցիչների հետ, որտեղ ամփոփվել են 2019 թվականի ընթացքում իրականացված ծրագրերը, 2020 թվականի ծրագրային հեռանկարները, խոսվել է ասոցիացիայի կողմից Իզերում հայկական մշակույթի առաջխաղացմանը նպաստող միջոցառումների մասին: Իսկ երեկոյան նախատեսվում է միջոցառում Գրենոբլի եւ Դոֆինեի հայ մշակույթի տանը, Իզերում գործող եւ հայկական սփյուռքը ներկայացնող ասոցիացիաների մասնակցությամբ: Այդ ընթացքում կներկայացվեն նաեւ Իզեր - Գեղարքունիք եւ Սեւան-Գրենոբլ համագործակցությունների տուրիստական օպերատորների կողմից իրականացվող ծրագրերը:
Խոսրով Խլղաթյան