Բելառուսում շաբաթ ընդդիմության անցկացրած ցույցերի ընթացքում առնվազն 25 լրագրող է ձերբակալվել, որոնց մեծամասնությունն արդեն ազատ է արձակվել: Այս մասին հաղորդում է INTERFAX.RU-ն` վկայակոչելով Բելառուսի լրագրողների միության հաղորդագրությունը:
Ինչպես ասվում է միության հաղորդագրության մեջ, լրագրողներից 20-ին ազատ են արձակել: Նրանցից շատերին ձերբակալել էին մայրաքաղաք Մինսկում:
Բացի այդ, լրագրողները հայտնում են բրիտանացի լրագրող Ֆիլիպ Վորվիկի անհետացման մասին: Ինչպես նշվում է, նրա ձերբակալության մասին ևս լուր չի հաղորդվում:
Այսօր Մինսկում, Գոմելում, Վիտեբսկում, Գրոդնոյում և Բրեստում ընդդիմության ցույցեր են անցկացվել` նվիրված «Կամքի օրվա» տոնակատարություններին: Իշխանությունների կողմից ցույցերն արտոնված են եղել միայն Գրոդնո և Բրեստ քաղաքներում:
