Լեռնային Ղարաբաղի Հանրապետության հյուսիս-արեւելյան սահմանին դեկտեմբերի 30-ին հրազենային վիրավորում ստացած ժամկետային զինծառայող Գարիկ Վարդանյանը դուրս է եկել կոմայից: Չնայած սրան՝ երիտասարդի վիճակը շարունակում է մնալ ծանր: Նրա բուժումն իրականացվում է Երեւանի կայազորային հոսպիտալի վերակենդանացման բաժանմունքում:
Ինչպես Armtimes.com-ի հետ զրույցում ասել է Գարիկի տատիկը՝ Զոյա Մարգարյանը, թոռը գիտակցության է եկել, կարողացել է թեթեւ սեղմել իրեն տեսակցության գնացած ծնողների ձեռքերը: «Գարիկը դեռ չի խոսում, միայն կարողանում է ինքնուրույն շնչել: Սնվում է կոկորդին միացված խողովակի միջոցով: Ինչ վերաբերում է ուղեղի այտուցին, բժիշկներն ասում են, որ աննշան փոքրացել է, ճնշումն էլ կարգավորվել է»,- ասաց զինծառայողի տատիկը:
Զոյա Մարգարյանը նաեւ տեղեկացրեց, որ բժիշկները չեն շտապում կանխատեսել՝ երբ զինծառայողի վիճակը կկայունանան, եւ նրան հիվանդասենյակ կտեղափոխեն: Մինչ այդ՝ տեսակցությունները թույլատրված են միայն Գարիկի ծնողներին, տատիկը նրան տեսնել չի կարողացել:
Հիշեցնենք, Գարիկ Վարդանյանը հրազենային վիրավորում ստանալու օրը տեղափոխվել էր Ստեփանակերտի զինվորական հոսպիտալ, այնուհետեւ ուղղաթիռով՝ Երեւանի կայազորային հոսպիտալ (Մուրացանի հոսպիտալ):
Հրազենային վնասվածքը զինծառայողը ստացել էր մարտական հերթապահություն իրականացնելիս՝ դիտակետում, երբ կատարել է մարտական առաջադրանքը: Հակառակորդի դիպուկահարի գնդակը խոցել էր նրա դեմքը:
Նշենք, որ Գարիկ Վարդանյանը հունվարի 17-ին պետք է զորացրվեր: Ժամկետային զինծառայողն Արարատի մարզի Այգեստան գյուղից է, ընտանիքը զբաղվում է գյուղատնտեսությամբ, ունի մեկ քույր եւ մեկ եղբայր:
Նյութի աղբյուր`
