Արագածոտնի մարզում փետրվարի 26-ին, դաժան սպանություն է տեղի ունեցել. ժամը 17։30-ի սահմաններում ոստիկանության Թալինի բաժին ահազանգ է ստացվել, որ Երեւան-Գյումրի ավտոճանապարհի Թլիկ գյուղի վարչական տարածքում՝ ձնակույտում հայտնված Mercedes կա իսկ մեքենայից քիչ այն կողմ տղամարդու դի կա։
Shamshyan.com-ի փոխանցմամբ, դեպքի վայր ժամանած ոստիկաններն ու քննիչները Mercedes մակնիշի 35 DX 790 համարանիշի ավտոմեքենայի մոտ հայտնաբերել են պարանոցը կտրած տղամարդու դի։ Դատաբժշկի նախնական եզրակացության համաձայն տղամարդը մահացել է դանակի մի քանի հարվածներից։
Մահացածը Երեւանի բնակիչ, 20-ամյա Կառլեն Գրիգորյանն էր, ով ավտոմեքենան շահագործում էր որպես տաքսի։
Ժամեր անց նշված սպանությունը կատարելու կասկածանքով Թալինի ոստիկանություն բերման են ենթարկվել Գյումրիի բնակիչ, ժամանակավորապես Երեւանում բնակվող 25-ամյա Վահան Հ.-ն:
Աղբյուրի փոխանցմամբ, նախնական տեղեկություններով, կասկածյալը Լենինգրադյան փողոցում նստել է նշված տաքսին եւ պատվիրել մեկնել Գյումրի։ Արդեն նշված հատվածում ուղեւորը դանակի մի քանի հարվածով կտրել է երիտասարդի պարանոցը, որից հետո դին տեղափոխել է ավտոմեքենայի հետնամաս եւ փորձել այդ ավտոմեքենայով սպանության վայրից դիմել փախուստի, սակայն հայտնվել է ձնակույտի մեջ:
Վահան Հ.-ն ձերբակալվել է։
