«Լրագրողներ առանց սահմանների» կազմակերպությունն իր մտահոգությունն է հայտնել Ադրբեջանում հերթական լրագրողի՝ մարզային կայքի խմբագիր Էլչին Իսմաիլիի ձերբակալության մասին տեղեկության առնչությամբ, գրում է contact.az-ը: Նրա անունն ավելացել է լրագրողների երկար շարքին, ովքեր կեղծ մեղադրանքներով ձերբակալվել են Ադրբեջանում:
Այսօրվա դրությամբ այդ երկրում առնվազն 12 լրագրող, բլոգեր և ԶԼՄ-ների աշխատակից ճաղերի հետևում է:
Փետրվարի 17-ին ձերբակալվելու հետո խմբագիրը կալանավորվել է մինչդատական կարգով 24 օրվա ժամկետով՝ «ծանրացուցիչ հանգամանքներում դրամաշորթության մեջ» մեղադրանքով:
Դատախազությունը նրան մեղադրել է տեղի պաշտոնյաներից մեկին շանտաժի ենթարկելու մեջ: Իսմաիլին պնդում է, որ մեղադրանքները կեղծվել են՝ ստիպելու համար նրան դադարեցնել տեղի իշխանությունների քննադատությունը:
Իսմաիլին կոռուպցիայի և մարդու իրավունքների խախտումների մասին գրող kend.info կայքի հիմնադիրն է և խմբագիրը: Նա բազմիցս ենթարկվել է տեղի իշխանությունների կողմից հետապնդումների, այդ թվում ֆիզիկական բռնության, ձերբակալությունների և զրպարտության մեջ մեղադրանքների:
«Բաքվի միջազգային գործընկերները չպեք է հանգիստ հետևեն, երբ լրագրողներին բանտ են նստեցնում Ադրբեջանում»,- ասված է կազմակերպության հայտարարությունում: