ՀՀ սփյուռքի նախարար Հրանուշ Հակոբյանը մասնակցեց մանկապատանեկան գրքի երևանյան 14-րդ տոնավաճառի շրջանակում Խնկո Ապոր անվան ազգային մանկական գրադարանի հեքիաթի սրահում կազմակերպված հեքիաթապատումին:
Սփյուռքի նախարարը հանդիպում ունեցավ Երևանի Մարտիրոս Սարյանի անվան թիվ 86 դպրոցի երրորդ և չորրորդ դասարանների աշակերտների հետ, զրուցեց մայրենի լեզվի մասին, լսեց նրանց մտահոգությունները հայոց լեզվի մաքրության վերաբերյալ: Նա հիացավ մայրենիի մասին երեխաների բազմակողմանի գիտելիքներով: Երեխաները արտասանեցին հայոց լեզվին նվիրված բանաստեղծություններ:
«Հայ ժողովրդի գանձարանում ամենաթանկ գանձն է հայերենը, և մեզանից յուաքանչյուրի պարտքն է պահել, պահպանել ու զարգացնել այն»,- ասաց նախարարը:
Այնուհետև Հրանուշ Հակոբյանը երեխաների խնդրանքով ընթերցեց Հովհաննես Թումանյանի մանկական ստեղծագործություններից:
Նախարարը հորդորեց դպրոցում լավ սովորել բոլոր առարկաները, բայց առանձնակի սիրով ու հոգածությամբ կիրառել մայրենին, լսել ծնողների խորհուրդները և դառնալ լավ մարդ, լավ մասնագետ, լավ զավակ ու լավ հայ:
