Իսպանական Պրիմերայի 17-րդ տուրում «Բարսելոնան» Մադրիդի «Սանտիագո Բեռնաբեու» մարզադաշտում հյուրընկալվել է «Ռեալի» կողմից և 3:0 հաշվով ջախջախիչ հաղթանակ տարել:
Այս կերպ, Իսպանիայի առաջնության պատմության մեջ առաջին անգամ է «Բարսելոնան» հյուրընկալվելիս հաղթում «Ռեալին»` 3 մրցաշրջանում անընդմեջ:
Հիշեցնենք` հանդիպման հաշիվը խաղի 54-րդ րոպեին բացել է Լուիս Սուարեսը: 9 րոպե անց «Ռեալի» պաշտպան Դանիել Կարվախալը կարմիր քարտ է ստացել սեփական տուգանայինում ձեռքով խաղալու համար և հեռացվել է խաղադաշտից: Լիոնել Մեսսին անվրեպ է իրացրել նշանակված 11-մետրանոցը, իսկ կապտանռնագույնների կազմում երրորդ գոլը հեղինակել է Ալեյշ Վիդալը, որն աչքի է ընկել հիմնական ժամանակին ավելացրած 3-րդ րոպեին:
Այս խաղից հետո «Բարսելոնան» 45 միավորով շարունակում է միանձնյա գլխավորել մրցաշարային աղյուսակը: «Ռեալը» 31 միավորով զբաղեցնում է 4-րդ հորիզոնականը, սակայն մեկ խաղ պակաս է անցկացրել:
