Ֆրանսիան անհանգստանում է Լեռնային Ղարաբաղի հակամարտության համար։ Այսօր լրագրողների հետ զրույցում նման հայտարարություն արեց Հայաստանում Ֆրանսիայի արտակարգ և լիազոր դեսպան Ժոնաթան Լաքոտը:
Նա նշեց, որ շատ զինվորներ են զոհվում։
«Այս տարվա սկզբից մինչ օրս շուրջ 57 զինվոր է մահացել: Լեռնային Ղարաբաղի հակամարտությունը բնավ սառեցված հակամարտություն չէ։ Այն գործող կոնֆլիկտ է, որն ազդում է ժողովրդի եւ տնտեսության վրա: Սա իրական հակամարտություն է, որը ծանր ազդեցություն ունի Հայաստանի համար»,- ասաց դեսպանը՝ նշելով, որ դա իրենց անհանգստացնում է։
Դեսպանը նշեց, որ Ֆրանսիան վճռական է իր պարտականությունները որպես ԵԱՀԿ Մինսկի խմբի համանախագահող երկիր կատարելու հարցում:
«Այս հակամարտությունը ռազմական լուծում չի կարող ունենալ: Ֆրանսիան հետևողական է, պատրաստ է լիակատար իրականացնել այն հանձնառությունները, որոնք ստանձնել է ԵԱՀԿ Մինսկի խմբի շրջանակներում: Սա այն հակամարտությունն է, որին Ֆրանսիայում ուշի ուշով հետևում են ղեկավարության ամենաբարձր մակարդակում: Ամեն դեպքում խոսքը միջնորդական դիրքորոշման մասին է: Բանակցված և տևական լուծում գտնելու կարևորությունը, բնականաբար, պատկանում է երկու հակամարտող կողմերին», - ասաց նա։
