ԱԺ «Ելք» խմբակցության ղեկավար Նիկոլ Փաշինյանը խորհրդարանում օրակարգի վերաբերյալ վարման կարգով խոսելովհայտարարեց, որ գրավոր հարցում է ուղարկել ՀՔԾ պետ Վահրամ Շահինյանին, թե իրավական ինչ հիմնավորմամբ են քննիչների աշխատասենյակներում կախված նախագահի լուսանկարները: Նա նկատեց, որ 6 ամիս է անցել, իսկ իր հարցմանը պատասխան դեռ չկա, ինչը օրենքի խախտում է: Փաշինյանը նշեց՝ այս հարցում լինելու է հետևողական, զգուշացրեց բոլոր քննիչներին. «Հանել Սերժ Սարգսյանի լուսանկարները, քանի որ դրա համար որևէ իրավական հիմնավորում չկա, եթե Սերժ Սարգսյանին որևէ քննիչ իր պապը կամ հայրը չի համարում»,-ասաց Փաշինյանը:
Նիստը վարող ԱԺ փոխնախագահ Արփինե Հովհաննիսյանն ասաց, որ Փաշինյանի ելույթը չէր վերաբերում օրակարգին: ՀՀԿ-ական Խոսրով Հարությունյանը տեղից նկատողություն արեց, թե ինչու նիստ վարողը չի ընդհատում Փաշինյանին:
«Ընդհատեցի, պարո՛ն Հարությունյան, ես նիստը վարում եմ այնպես, ինչպես նպատակահարմար եմ գտնում, և ինչպես օրենքն է»,-ասաց Հովհաննիսյանը: