Սանկտ Պետերբուրգի մանկապարտեզներից մեկում 4-ամյա երեխայից առգրավված ատրճանակը, պարզվել է, որ խաղալիք է եղել: Ինչպես գրում է Lenta.ru-ն, խաղալիքը տղային նվիրել էին ծնողները:
Օրինապահների տվյալներով՝ ատրճանակն ուղարկվել է փորձաքննության, որի արդյունքները ցույց են տվել, որ այն իրական չէ և նույնիսկ լիցքավորված չի եղել պլաստմասե փամփուշտներով, այդ իսկ պատճառով իրենից որևէ վտանգ չի ներկայացրել:
Խաղալիքի նմանությունը օդաճնշիչ զենքի հետ բացատրվում է դրա բարձր որակով և արժեքով: Ընտանիքն այն ձեռք է բերել 11 000 ռուբլիով: «Խաղալիք ատրճանակը նման է իրականին և շփոթության մեջ է գցել նույնիսկ մեծահասակներին»,-ասվում է մամլո հաղորդագրության մեջ:
Ավելի վաղ հաղորդվում էր, որ նոյեմբերի 29-ին փոքրիկ տղան ատրճանակի նման առարկա է բերել մանկապարտեզ: Դաստիարակներից մեկը ոստիկանություն է կանչել, որից հետո ատրճանակը երեխայի մոտից առգրավվել է, իսկ ծնողների հետ զրուցել են զենքի հետ վարվելու կանոնների մասին:
