Երևանու ավագանու այսօրվա նիստում հաստատվեց «Մոնթե Մելքոնյանի անվամբ փողոց անվանակոչելու մասին» նախագիծը, որը համահեղինակել են Երևանի ավագանու ՀՀԿ և «Ելք» խմբակցությունները:
Նախագիծն ի սկզբանե ներկայացրել էր «Ելք» խմբակցությունը, որը մշակույթի հանձնաժողովում ՀՀԿ ավագանու կողմից մերժվել էր, բայց հետագայում հանդես են եկել համատեղ նախաձեռնությամբ:
Նախագծով առաջարկվում է Լենգինգրադյան փողոցը Իսակով պողոտային կապող նորակառույց փողոցն անվանակոչել Մոնթե Մելքոնյանի անվամբ:
ՀՀԿ-ի անունից զեկույցով հանդես եկավ Սերգեյ Մկրտչյանը, ով նշեց, որ Մոնթե Մելքոնյանի փողոցն անվանակոչելու անհրաժեշտությունն առաջացել է ՀՀԿ և «Ելք» խմբակցությունների առաջարկությունների և քննարկումների արդյունքում, իսկ, մինչ այդ, օբյեկտիվ պատճառներով ձգձգվել է:
Նա նշեց, որ ՀՀԿ-ն կողմ է քվեարկելու առաջարկին։
Հարց ուներ «Ելք» խմբակցության անդամ Ալեն Սիմոյանը։ Նա հետաքրքվեց, թե ինչ օբյեկտիվ պատճառներ են եղել, որ ձգձգվել է:
Հարցին պատասխանեց Երևանի քաղաքապետ Տարոն Մարգարյանը՝ նշելով, որ հարցը մեկ տարուց ավելի քննարկվել էր և ձգձգման պատճառը փողոցի հարակից կառուցապատման խնդրին էր վերաբերվում:
«Սսպասեցինք մինչև կառուցապատող գտնվի, ծրագիրը հաստատվի, որ փողոցի անվանը վայել լինի», - ասաց նա։
«Ելք» խմբակցության անդամ Անի Խաչատրյանն էլ հայտարարեց, թե ՀՀԿ-ն «Ելք»-ի առաջարկած նախագծին՝ «փայ է մտել»:
«Ելք»-ի պատասխանը քաղաքապետ Տարոն Մարգարյանի սրտով չէր. «Նման տերմին օգտագործելը տեղին չէ, ընդամենը «Ելք»-ն ուզում էր վերմակը քաշել մի քիչ իր վրա»:
Նածագծի վերաբերյալ ելույթով հանդես եկավ «Ելք» խմբակցության ղեկավար Դավիթ Խաժակյանը, ով նշեց, որ իրենց համար կարևոր էր, որ քննարկումների արդյունքը դրական է և նախագիծը հավանության արժանացավ:
Դավիթ Խաժակյանը նշեց, թե «Ելք» խմբակցությունը, եթե անվանակոչումների փաթեթը չներկայացներ, երբևէ նման հարց չէր ներկայացվի:
«Երբևիցե մի բացառեք, պարոն Խաժակյան», - արձագանքեց Տարոն Մարգարյանը։
«Երկիր ծիրանի» խմբակցության անդամ Մարինա Խաչատրյանն էլ հայտարարեց, թե Մոնթե Մելքոնյանի անվամբ կենտրոնական մեծ փողոց պետք է անվանակոչվեր, ոչ թե ծայրամասային փողոց, որտեղ մարդիկ չեն բնակվում։
««Երկիր ծիրանին» իր վրդովմունքն է հայտնում մեծն Ավոյի անվամբ մի ծայրամասային փողոց անվանակոչելու մասին նախագծին, քվեարկությանը խմբակցությունը չի մասնակցելու», - ասաց նա։