«Երբ ասում են՝ Հայաստանը թանգարան է բաց երկնքի տակ, հիմա Հաղթանակի զբոսայգու հարևանությամբ գտնվող տարածքներն իսկապես կոռուպցիայի թանգարան են բաց երկնքի տակ»: Այս մասին, այսօր ԱԺ ճեպազրույցների ժամին ասաց «Ելք» խմբակցության ղեկավար Նիկոլ Փաշինյանը՝ արձագանքելով ՀՅԴ-ական Աղվան Վարդանյանի՝ քիչ առաջ հնչեցրած տեսակետին, թե ավելի շքեղ դղյակներ կան Հաղթանակի զբոսայգուց բացի այլ տարածքներում:
Ըստ Փաշինյանի՝ բացառված է, որ այնտեղ լինի որևէ հողակտոր, որևէ գործողություն, որ կոռուպցիայի հետ կապ չունենա:
«Մենք կարող ենք լինել առաջին պետությունը, որ պաշտոնապես կոռուպցիայի թանգարան ունենք բաց երկնքի տակ: Հաշվի առնելով, որ Հովիկ Աբրահամյանը զբաղվածության խնդիր ունի, կարող ենք այդտեղ գիդ նշանակել»,- նշեց նա։
Ինչ վերաբերում է ԱԻՄ առաջնորդ Պարույր Հայրիկյանի հայտարարած հացադուլին Սահմանադրության մեջ փոփոխություններ անելու պահանջով, ապա Նիկոլ Փաշինյանը նկատեց. «Դա կախված է բովանդակությունից առաջին հերթին, շատ հոռետեսորեն եմ վերաբերում հացադուլի ինստիտուտին՝ որպես քաղաքական գործիք: Եթե որևէ մեկը հացադուլ է հայտարարում ինչ-որ պահանջով, ինքը պետք է հաշիվ տա այդ քայլի լրջությանը, եթե ենթադրենք, որ իր պահանջը չկատարվի, դադարեցնելո՞ւ է, ի՞նչ է լինելու:
Բայց եթե անժամկետ չի, ուրիշ բան»:
Նա նշեց, որ կծանոթանան հացադուլի պահանջների բովանդակությանն, ապա համապատասխան եզրակացությունները կանեն:
