Երեւանի ավագանու այսօրվա նիստի օրակարգային հարցերի մի մասը վերաբերվում էր պատվավոր քաղաքացու կոչումներ շնորհելուն, իսկ մյուս մասը մի խումբ անձանց բնակարանով ապահովելուն:
Պատվավոր քաղաքացիների կոչում շնորհելու հարցերի վերաբերյալ «Երկիր ծիրանի» խմբակցության անդամները քննադատող ելույթներ ունեցան: Նույն Խմբակցության անդամ Մարինա Խաչատրյանը հայտարարեց, որ Երեւանի պատվավոր քաղաքացու կոչում շնորհելն անպատվաբեր է դարձել: «Այս կոչումներն արդեն մեր Հանրապետությունում.., բազմաթիվ կոչումներ, մեդալներ եւ այլն, դրանք արդեն արժեզրկվել են, որովհետեւ տրվում են պատեհ, անպատեհ եւ այն մարդկանց կողմից, ովքեր քանդում են մեր քաղաքը, մեր երկիրը: Ես համարում եմ, որ ամոթ է, որ նման վաստակաշատ մարդիկ, այդ թվում նաեւ Ռալֆ Յիրիկյանը, նմանատիպ պարգեւ, նմանատիպ կոչում ստանա Երեւան քաղաքը քանդող քաղաքապետ Տարոն Մարգարյանի ձեռքից»,- իր ելույթում նշեց Մարինա Խաչատրյանը:
Երեւանի փոխքաղաքապետ Կամո Արեյանին դուր չեկավ «Երկիր ծիրանի» խմբակցության անդամի ելույթի վերջնամասը եւ տեղից հակադարձեց. «Դե վեր ընգի տեղդ, տո՛... վեր ընգի տեղդ»: Կամո Արեյանին ձայնակցեց նաեւ Հանրապետական խմբակցության մեկ այլ անդամ՝ Նաիրա Նահապետյանը: «Դու ինչ մարդ ես, պետք ա աշխատել իմանաս»,- ասաց Նաիրա Նահապետյանը, որը առավել հայտնի է ՀԷԿ-երի Նաիրա անունով:
Նիստի վերջում դարձյալ ելույթ ունեցավ փոխքաղաքապետ Կամո Արեյանը` ով դիմելով «Երկիր ծիրանի» խմբակցության ներկայացուցիչներին ասաց.«Եթե որոշել եք մեր կյանքը դժոխքի վերածել, Աստված Ձեր կյանքն արդեն վերածել է: Ռեխներդ բացելուց առաջ հաշիվ տվեք Ձեզ»:
Armday.am