Կառավարությունն այսօրվա նիստին որոշեց «ԷՌԱ ԹԵՔՆՈԼՈՋԻՍ» սահմանափակ պատասխանատվությամբ ընկերությանը տրամադրել «Ալյանս» ազատ տնտեսական գոտու «ՌԱՕ Մարս» ՓԲԸ տարածքում շահագործողի թույլտվություն՝ էլեկտրոնիկայի և ճշգրիտ ճարտարագիտության ոլորտում գործունեություն ծավալելու համար, այդ թվում՝ նորարարական տեխնոլոգիաներով «խելացի դրամապանակներ» և աքսեսուարներ արտադրելու համար:
Շահագործողի թույլտվության գործողության ժամկետը սահմանվում է 5 տարի: Տնտեսական զարգացման և ներդրումների փոխնախարար Գարեգին Մելքոնյանը զեկուցեց, որ նախատեսվում է, որ ընկերությունն իրականացնելու է ներդրումային ծրագիր շուրջ 2.3 միլիոն ամերիկյան դոլարի չափով, ծրագրի շրջանակներում պետք է ստեղծվի 15 նոր աշխատատեղ, հետագայում դա կաճի մինչև 50-ի: Արտադրանքի հիմնական մասը կազմակերպությունը պատրաստվում է արտահանել՝ առաջին տարում մոտ կես միլիոն, հետո՝ երկու միլիոնի չափով:
Armday.am-ի ունեցած տեղեկություններով սույն ընկերության փայատերերից է ԱԺ ՀՀԿ խմբակցության պատգամավոր Խոսրով Հարությունյանի որդին:
