«Արարատի մարզի Նոր կյանք համայնքի ղեկավար, «Քաղաքացիական պայմանագիր» կուսակցության անդամ Գարիկ Սարգսյանն ուսումնասիրություններ է սկսել համայնքի նախկին տարիների գործունեության վերաբերյալ և մի շարք ուշագրավ բացահայտումներ արել:
«Armtimes.com-ի հետ զրույցում նա մանրամասնեց, որ մինչև 2016 թվականը համայնքային սեփականություն հանդիսացող հողամասեր են օտարվել, որից ավագանին, ամենայն հավանականությամբ, տեղյակ չի եղել, սակայն ավագանու անդամների անվանումների դիմաց արձանագրություններում ստորագրություններ են եղել դրված:
Կատարված ուսումնասիրությունների, ձեռնարկված քայլերի վերաբերյալ Armtimes.com-ը զրուցել է Գարիկ Սարգսյանի հետ:
-Պարոն Սարգսյան, ի՞նչ ուսումնասիրություններ եք սկսել:
-Համայնքի ավագանու նիստերի 2003-2016 թթ. արձանագրությունների ուսումնասիրության ժամանակ պարզվել է, որ դրանց առնվազն նշանակալի մասը հնարավոր է կեղծված են, քանի որ դրանցում առկա ստորագրությունները, առաջին հայացքից, չեն պատկանում ավագանու անդամներին:
-Ինչի՞ց եք եզրահանգել:
-Նախ, նշված փաստի մասին կարող են վկայել 2016 թ. նոյեմբեր ամսից հետո կազմված ավագանու նիստերի արձանագրությունները: Ավագանու նոր կազմի անդամների մի մասը նաև նախորդ ավագանու անդամներ են հանդիսանամ և վերջիններիս դրված ստորագրությունները չեն համընկնում նախկինում դրված ստորագրությունների հետ: Միաժամանակ, ավագանու անդամներից մեկը հաստատել է այն փաստը, որ 2016 թ, նոյեմբերից առաջ կազմված մի շարք արձանագրություններում իր անվան դիմաց ստորագրությունները իրենը չեն:
-Ի՞նչ գործարքներ է արվել ենթադրյալ կեղծարարությամբ:
-Նման արձանագրության հիման վրա 2004 թ. համայնքի նախկին ղեկավարի կողմից կադաստրային արժեքի 30 տոկոսով օտարվել են համայնքային սեփականության հողամասեր վերջինիս ընտանիքի անդամներին: Ստուգողական գործողությունների ընթացքում պարզվել է նաև, որ համայնքի իրականացրած գնումները չեն համապատասխանում «Գնումների մասին» ՀՀ օրենքի պահանջներին, չի պահպանվել օրենքով սահմանված ընթացակարգը և/կամ պատշաճ փաստաթղթավորված չեն:
-Պարզելով այս ամենը՝ ի՞նչ քայլեր եք ձեռնարկել: Դիմե՞լ եք իրավապահներին:
- Վերոգրյալ խախտումների մասով ներկայացվել է հաղորդում հանցագործության մասին, որով խնդրել եմ դեպքի առիթով հարուցել քրգործ ՀՀ քր. օր. 314-րդ (պաշտոնեական կեղծիք) և 309-րդ (պաշտոնական լիազորություններն անցնել) հոդվածների հատկանիշներով: Համայնքի սեփականության իրավունքի պաշտպանության շրջանակներում հողամասերը համայնքին վերադարձնելու համար հարուցվել են քաղաքացիական հայցեր»,-գրում է թերթը:
Նյութն ամբողջությամբ կարդացեք թերթի այսօրվա համարում: