ԱՄՆ-ի և Հարավային Կորեայի Ulchi – Freedom Guardian համատեղ զորավարժությունների անցկացումը հանդիսանում է Հյուսիսային Կորեայի հանդեպ թշնամանքի դրսևորում և կուժեղացնի լարվածությունը Կորեական թերակղզում։ Այս մասին գրում է Հյուսիսային Կորեայի կենտրոնական «Նոդոն սինմուն» թերթը։
Հրապարակման հեղինակների կարծիքով՝ զորավարժությունները միայն յուղ կլցնեն կրակի վրա և կսրեն իրավիճակը։ «Դա թշնամական գործողություների դրսևորում է մեր նկատմամբ, ԱՄՆ-ը շարունակում է անտեսել մեր զինվորականների բազմաթիվ նախազգուշացումները»,-հավելում է պարբերականը։ Նշվում է, որ Հավային, Գուամ կղզին և նույնիսկ ԱՄՆ-ի հիմնական տարածքը պաշտպանված չեն Փխենյանի հարվածներից։
Ulchi – Freedom Guardian կանոնավոր վարժանքներն այս տարի կանցկացվեն օգոստոսի 21-31-ը։ Դրանց կմասնակցեն ամերիկացի 17.5 հազար զինծառայողներ, ինչպես նաև մոտ 50 հազար հարավկորեացի զինվորականներ։
