Այսօր՝ օգոստոսի 19-ին, Հայաստանի քննչական կոմիտեի Զինվորական քննչական վարչության 6-րդ կայազորային քննչական բաժնի քննիչը միջնորդություն է ներկայացնելու Տավուշի մարզի ընդհանուր իրավասության դատարան (նստավայրը՝ Իջևան), որպեսզի դատարանը՝ որպես խափանման միջոց, երկամսյա կալանքի որոշում կայացնի Տավուշի մարզի Ներքին Կարմիրաղբյուր գյուղի բնակիչ՝ 37-ամյա Արթուր Լալայանի նկատմամբ։
Ինչպես հայտնում է Shamshyan.com-ը, վերջինս, ով պայմանագրային զինծառայող է, կասկածվում է իր ծառայակից, համագյուղացի, 32-ամյա Վարդան Գրիգորյանին առանձնակի դաժանությամբ սպանելու և դին այրելու մեջ։
Կայքի տեղեկություններով՝ ոստիկաններն ու քննիչները հսկայածավալ աշխատանքներ են կատարել, ինչի արդյունքում էլ պարզվել է, որ սպանությունը կապ չունի նրանց ծառայության հետ։ Այն առնչվում է անձնական խնդրին։
Փաստի առթիվ ՀՀ քր.օր-ի 104 հոդվածի 1-ին մասով հարուցվել է քրեական գործ։
Կայքի փոխանցմամբ՝ կասկածյալն արդեն տեղափոխվել է Ռազմական Ոստիկանության Իջևանի մեկուսարան, որտեղից նրան տեղափոխելու են դատարան, որտեղ դռնփակ դատական նիստը լինելու է դռնփակ, և եթե դատարանը բավարարեց քննչական մարմնի միջնորդությունը, ապա Ա. Լալայանը կկալանավորվի ու կտեղափոխվի բանտ։