Օգոստոսի 17-ին Բարսելոնայի Լաս Ռամբլաս մարդաշատ փողոցում կատարված ահաբեկչության հետևանքով ստեղծված քաոսում անհետացել է Ավստրալիայի 7-ամյա բնակիչ Ջուլիան Կադմանը: Հայտնի է, որ դպրոցականը մոր՝ Ջոմ Կադմանի հետ է եղել այն պահին, երբ Fiat միկրոավտոբուսը մխրճվել է հետիոտների ամբոխի մեջ՝ դառնալով 13 մարդու մահվան պատճառ:
Ինչպես նշում է The Daily Mail-ը, Ավստրալիայի վարչապետ Մալքոլմ Թերնբուլը, դիմելով ավստրալացիներին, խնդրել է աղոթել տղայի համար, որպեսզի նա հնարավորինս շուտ հայտնաբերվի ու միավորվի ընտանիքի հետ:
Հայտնի է, որ տղայի մայրը հարձակման հետևանքով ծանր վիրավորվել է ու այժմ կոմայի մեջ է: Ջոմ Կադմանին հիվանդանոց են տեղափոխել, իսկ տղան անհետացել է: Այժմ փոքրիկի ազգականներն ու ծանոթները սոցկայքերում ակտիվ շրջանառում են նրա լուսանկարն ու խնդրում օգտատերերին օգնել գտնել Ջուլիանին:
Մինչդեռ տղայի հայրը, որն աշխատանքի պատճառով Սիդնեյում էր մնացել, ուղևորվում է Իսպանիա, որպեսզի գտնի որդուն:
Պարբերականը հավելում է, որ Բարսելոնայում կատարված ահաբեկչությունից զոհվել ու տուժել է ավելի քան 18 երկրի քաղաքացի:
