Ինտերիերի հարդարմամբ զբաղվող ֆրանսիացի դիզայներ Օդիլ Սուդանը դատի է տվել նախկին աստղային զույգ Բրեդ Փիթին ու Անջելինա Ջոլիին ֆրանսիական Պրովանսի շատոներից մեկում իրեն աշխատեցնելու ու դրա դիմաց լիարժեք չվճարելու համար:
Ինչպես նշում է The Guardian-ը, ֆրանսուհին պնդում է նաև, որ նախկին զույգի չվճարելու պատճառով իր դիզայներական ընկերությունը ֆինանսական կոլապսի մեջ է հայտնվել: Աղբյուրը մանրամասնում է, որ Սուդանի Lumières Studio ընկերությունը զբաղվել է Փիթի ու Ջոլիի 17-րդ դարի Château Miraval կալվածքի լուսավորման հարցերով:
Թեև համագործակցող կողմերի միջև պայմանագիր չի կնքվել, այնուհանդերձ՝ Սուդանն ամեն ամիս Ջոլիին ու Փիթին ներկայացրել է արված ծախսերի չափը: Նշվում է, որ ֆրանսուհին կալվածքի լուսավորման նախագծում ներառել է 17 մասնագետի:
Հայցվորի խոսքով՝ որոշ ժամանակ անց ամուսնական զույգը դադարել է իրեն վճարել՝ միևնույն ժամանակ պահանջելով, որ նա գա ու շարունակի աշխատանքը:
Ապրիլին Փարիզի դատարանը վճռել է, որ Փիթն ու Ջոլին պարտավոր են Սուդանին 565.000 եվրո վճարել՝ այդ թվում նաև 60.000 եվրո նրա հեղինակությանը վնաս պատճառելու համար:
Պարբերականը նկատում է, որ վճռի մասին միայն հիմա է հայտնի դարձել: Այժմ փոխհատուցում ստացած կինը պահանջում է, որ դատարանն իրեն ճանաչի որպես կալվածքի լուսավորման նախագծի հեղինակ: Հայտնի է, որ երբ աստղային զույգի ու ֆրանսուհու միջև ֆինանսական հարցի շուրջ տարաձայնություններ են առաջացել, Փիթն ու Ջոլին փաստաթղթերում նշել են, որ կալվածքի լուսավորման նախագծի հեղինակը մեկ այլ մարդ է:
Հայտնի է, որ հոլիվուդյան աստղերը կալվածքը գնել են 45 մլն եվրոյով: Այնտեղ նրանք ունեն խաղողի այգիներ ու զբաղվում են գինու, ինչպես նաև ձիթայուղի արտադրությամբ: