Թուրքական «Բարօրություն» կուսակցության նախագահ Թեմել Քարամոլլաօղլուն պաշտոնական նամակով Ստամբուլ է հրավիրել Մադրիդի «Ռեալի» պորտուգալացի հարձակվող Կրիշտիանու Ռոնալդուին՝ Թուրքիայում հաջակցություն Պաղեստինի կազմակերպվելիք լայնամասշտաբ հանրահավաքին մասնակցելու նպատակով։
Ինչպես գրում է թուրքական t24.com.tr կայքը, Պաղեստինի ու պաղեստինցիների նկատմամբ իր ուշադրությամբ ու դրական վերաբերմունքով աչքի ընկնող Ռոնալդուն, ով հաճախ է բարեգործական ակցիաների շրջանակներում գումարներ հատկացրել հատկապես պաղեստինցի երեխաների պաշտպանության նպատակով, հրավիրվել է Ստամբուլի Յենիքափը շրջանում կայանալիք և «Մեծ Երուսաղեմ» անվանումը կրող հակաիսրայելական ցույցին, որի նախաձեռնողը Թուրքիայի իշխանություններն են։
«Բարօրություն» կուսակցության նախագահը հատուկ նամակում նշել է, որ ֆուտբոլիստի մասնակցությունը կարող է հույս ներշնչել իրենց «պաղեստինցի եղբայրներին»։
Նշենք, որ Երուսաղեմում իրադրությունը շարունակում է մնալ լարված: Իսրայելի իշխանությունների կողմից սահմանած անվտանգության նոր նորմերը դարձել էին տեղի մահմեդական համայնքի դժգոհության պատճառ: Բողոքի ակցիաների ընթացքում մահացել էին պաղեստինցիներ, վիրավորվել տասնյակ մարդիկ:
Ավելի վաղ երեք իսրայելցի արաբ գրոհայինների հարձակման հետևանքով մահացել էին երկու իսրայելցի ոստիկաններ, ինչն էլ դարձել էր իշխանությունների կողմից անվտանգության նորմերը խստացնելու դրդապատճառ: