«Առավոտ» թերթը գրում է. «Հայաստանի կինեմատոգրաֆիստների միության նախագահ Ռուբեն Գեւորգյանցի մահվանից հետո նոր իրավիճակ է ստեղծվել կինեմատոգրաֆիստների ընտանիքում:
Բանն այն է, որ կինեմատոգրաֆիստների միության անդամներից շատերը սպասում են, որ առաջիկայում պետք է գումարվի կինեմատոգրաֆիստների միության համագումար, որն էլ պետք է վճռի միության նոր նախագահի հարցը: Սակայն տեղեկություններ կան, որ կինեմատոգրաֆիստների միության ներկայիս ղեկավարությունը հակված է սեպտեմբերին գումարել վարչության փակ նիստ եւ Ռուբեն Գեւորգյանցի որդուն՝ Վահե Գեւորգյանցին նշանակել միության նախագահի ժամանակավոր պաշտոնակատար՝ հետաձգելով միության համագումարը մեկ տարի ժամանակով:
Կինոգործիչներն այն մտավախությունն ունեն, որ այդ որոշումը կարող է հիմք հանդիսանալ, որպեսզի կինոմիության նախագահի պաշտոնը հորից ժառանգաբար փոխանցվի որդուն: Եթե Վահե Գեւորգյանցը մեկ տարի կատարի միության նախագահի ժամանակավոր պաշտոնակատարի պարտականությունները, մեկ տարի անց համագումարում ընդամենը հարկ կլինի վավերացնել նրա ձերբակալվածների պահման վայրի եւ քրեակատարողական պաշտոնը:
Մեզ հասած տեղեկությունների համաձայն, այս տակտիկան, որը մշակվել է կինոմիության ներկայիս փաստացի ղեկավարի՝ միության քարտուղար Ռուդոլֆ Վաթինյանի եւ Ռուբեն Գեւորգյանցի ընտանիքի կողմից, այնքան էլ չի բավարարում կինեմատոգրաֆիստների միության շատ անդամների:
Ի դեպ, Ռուդոլֆ Վաթինյանը միանձնյա որոշումներ կայացնելու հարցում, կարծես թե խնդիրներ չունի: Տեղեկություններ կային նաեւ, որ «Ոսկե ծիրան» միջազգային կինոփառատոնի ծրագրերից մեկը տապալելու որոշումը, որն անհարկի տհաճ աղմուկ բարձրացրեց փառատոնի շուրջ՝ հարվածելով փառատոնի վարկին, նույնպես միանձնյա էր կայացվել»:
Առավել մանրամասն՝ թերթի այսօրվա համարում