Կանխիկ դրամի շրջանառությունը սահմանափակվելու է


Կանխիկ դրամի շրջանառությունը սահմանափակվելու է
Հուլիս 12 19:10 2017

Հայաստանի Հանրապետության արդարադատության նախարար Դավիթ Հարությունյանն այսօր ընդունել է Եվրոպական հանձնաժողովի Արևելյան հարևանության հարցերով տնօրեն Լոուրենս Մերեդիթի գլխավորած պատվիրակությանը, տեղեկացնում է ՀՀ ԱՆ տեղեկատվության և հասարակայնության հետ կապերի վարչությունը:

Նախարարը շնորհակալություն է հայտնել եվրոպացի գործընկերներին Արդարադատության նախարարության հետ սերտ համագործակցության ու համատեղ իրականացրած ծրագրերի համար և փոխգործակցության շարունակականության պատրաստակամություն հայտնել:

Ներկայացնելով արդարադատության ոլորտում իրականացրած բարեփոխումները՝ Դավիթ Հարությունյանն ընդգծել է կոռուպցիայի դեմ պայքարում իրականացված քայլերը՝ ապօրինի հարստացման քրեականացում, հայտարարագրման գործընթացի բարելավում, կանխիկ դրամի շրջանառության սահմանափակում, հայտարարագիր տվող անձանց շրջանակի ընդլայնում, ազդարարների ինստիտուտի ներդրում, ինչպես նաև Հակակոռուպցիոն մարմնի ստեղծում: Հանդիպման ընթացքում նախարարն անդրադարձել է նաև դատաիրավական ոլորտի բարեփոխումներին, Մարդու իրավունքների պաշտպանության ռազմավարությանը, էլեկտրոնային կառավարության համակարգի զարգացմանն ու սահմանադրական օրենքների մշակման աշխատանքներին:

Լոուրենս Մերեդիթը կարևորել է հակակոռուպցիոն և դատաիրավական ոլորտներում իրականացված ծրագրերը և ԵՄ հետաքրքրվածությունն ու աջակցությունը հայտնել իրականացվող բարեփոխումներին:

Հանդիպման ավարտին կողմերը քննարկել են հետագա համագործակցության առաջնահերթությունները:

Հանդիպմանը մասնակցել են նաև արդարադատության նախարարի տեղակալներ Արթուր Հովհաննիսյանը, Սուրեն Քրմոյանը, Վիգեն Քոչարյանը, Հարևանության հարցերով գլխավոր տնօրինության Հայաստանի, Ադրբեջանի, Բելառուսի և Արևելյան գործընկերության հարցերով բաժնի ղեկավար Վասիլիս Մարագոսը, ՀՀ-ում ԵՄ պատվիրակության ղեկավար, դեսպան Պիոտր Սվիտալսկին, այլք:



loading...