ՀՀ կառավարությունը 2018-2020 թվականներին նախատեսում է միջինը 5,3 տոկոս տնտեսական աճ: Գործադիրը հավանություն տվեց ՀՀ 2018-2020 թվականների պետական միջնաժամկետ ծախսերի ծրագրին, որով էլ կանխատեսվում են առաջիկա տարիների տնտեսական ցուցանիշները: Մասնավորապես, ակնկալվում է, որ միջնաժամկետում ՀՆԱ-ի միջին 5.3% կանխատեսվող աճը հիմնականում պայմանավորված կլինի ծառայությունների և արդյունաբերության ճյուղերով: 2017 թվականի համար կանխատեսվում է 3.3 տոկոս, իսկ 2018-2020 թվականներին՝ համապատասխանաբար 4.7, 5.4 և 5.7 տոկոս տնտեսական աճ: Ծառայությունների և արդյունաբերության ճյուղերի նպաստումը ՀՆԱ-ի միջին աճին կկազմի, համապատասխանաբար, 2.3 և 1.4 տոկոսային կետ:
ՀՀ ֆինանսների նախարար Վարդան Արամյանի խոսքով՝ պետական ծախսերի միջնաժամկետ ծրագրման համակարգի ներդրումն ուղղված է լուծելու հետևյալ խնդիրները` բարելավել մակրոտնտեսական հաշվեկշռվածությունը՝ ի հաշիվ ռեսուրսների իրատեսական և համապարփակ փաթեթի ձևավորման, նպաստել պետական ֆինանսական միջոցների հաշվին կատարվող բյուջետային հատկացումների միջոլորտային և ներոլորտային արդյունավետ վերաբաշխմանը՝ ըստ գերակա ուղղությունների, հնարավորինս նվազեցնել քաղաքականությունների և դրանց ֆինանսավորման միջև առկա անորոշությունները` նպաստելով ծրագրերի մշակման որակի բարձրացմանը, ըստ ոլորտների սահմանել կոշտ բյուջետային սահմանափակումներ` ճյուղային նախարարությունների (գերատեսչությունների) համար պայմաններ և խթաններ ստեղծելով հասանելի միջոցների նպատակային և արդյունավետ օգտագործման համար, բարելավել բյուջետային ծրագրերի գնահատման համակարգը և մեծացնել պետական ֆինանսների կառավարման թափանցիկության աստիճանը:
«Պետական ծախսերի միջնաժամկետ ծրագրումը շարունակական գործընթաց է և, ըստ էության, իրենից ներկայացնում է «քաղաքականությունների ձևակերպում – պլանավորում – բյուջետավորում» տրամաբանական ամբողջական շղթա: Այն հնարավորություն է ընձեռում մեղմել հասանելի բյուջետային ռեսուրսների և պահանջվող ծախսերի միջև հնարավոր անհամապատասխանությունը, ինչպես նաև պետական ծախսերում կատարել առանձին բնագավառներում իրականացվող պետական քաղաքականության փոփոխություններին համարժեք փոփոխություններ», – ասաց Արամյանը:
Ծրագրով ակնկալվում է, որ համախառն ներքին արդյունքի նկատմամբ պետական բյուջեի եկամուտների հարաբերության ցուցանիշը 2018-2020 թթ. կտատանվի 23.4-23,6 տոկոսի սահմաններում, իսկ ներքին ռեսուրսների հաշվին ձևավորվող եկամուտների դեպքում` 22,8–23,3 տոկոսի սահմաններում: Հիմք ընդունելով պետական բյուջեի եկամուտների կանխատեսումային իրական ծավալները, կառավարությունը ծրագրում է 2018-2020 թթ. ծախսերի միջին տարեկան մակարդակը պահպանել ՀՆԱ-ի 26.1-25.7 տոկոսի սահմաններում:
