Երեւանի ավագանու արտահերթ նիստն այսօր ընթացավ լարված մթնոլորտում՝ փոխադարձ վիրավորանքներով եւ քննադատություններով:
Ընդմիջումից հետո, երբ քննարկվում էր քաղաքապետարանի աշխատակազմի հաստիքացուցակը եւ աշխատավարձի չափը, «Երկիր Ծիրանի» խմբակցության քարտուղար Մարինա Խաչատրյանը վարման կարգ խնդրեց:
«Մեր խմբակցության ղեկավար Զարուհի Փոստանջյանն ինձ լիազորել է, որ ես կարող եմ խմբակցության անունից հանդես գալ»,- հայտարարեց Մարինա Խաչատրյանը:
Երեւանի քաղաքապետ Տարոն Մարգարյանը հակադարձեց՝ նման ընթացակարգ չկա. խմբակցության քարտուղարը ղեկավարի փոխարեն կարող է խոսել, եթե ղեկավարը նիստերի դահլիճում չէ: Մարինա Խաչատրյանը շարունակեց խոսել, Տարոն Մարգարյանն էլ փորձում էր նրան ընդհատել:
«Ձեր ձայնն իջեցրեք»,- Տարոն Մարգարյանին դիմեց Զարուհի Փոստանջյանը:
Տարոն Մարգարյանը շարունակեց նիստը՝ ամբիոնի մոտ հրավիրելով փոխքաղաքապետ Կամո Արեյանին՝ ելույթ ունենալու:
«Հակասահմանադրական քայլ եք դուք կատարում, գողական...»,- տեղից գոռաց Զարուհի Փոստանջյանը:
«Երկիր Ծիրանի» խմբակցության ղեկավարի խոսքերը վերջնականապես հունից հանեցին Հանրապետական խմբակցության կանանց, նրանք տեղից հորդորում էին Փոստանջյանին կոռեկտ արտահայտվել՝ նշելով, որ հայ կնոջը ոչ հարիր խոսելաձեւ է:
«Փողոցում չենք գտնվում, հարգեք ներկաներին, եթե ձեզ էլ չեք հարգում... այ քեզ բառապաշար»,- Փոստանջյանին դիմեց ՀՀԿ-ական Հասմիկ Սարգսյանը:
Կանանցից մեկն էլ տեղից նկատեց. «Տվին, անցան իրանց»: