«Հայկական ժամանակ» թերթը գրում է. «Երեւանի քաղաքապետարանի աշխատակազմի հանրակրթության վարչության նորանշանակ պետ Աննա Ստեփանյանն իր ուրույն ներդրումն է ունեցել Երեւանի ավագանու մայիսի 14-ին կայացած ընտրությունների ժամանակ:
«Ազատություն» ռադիոկայանի այդ օրվա տեսանյութում նշվում է, որ նա որպես դիտորդ ընտրատեղամասերից մեկում գտնվել է կեղծ վկայականով: Տիկինը ներկայացել է «Կրթություն եւ մշակույթ» կազմակերպության անունից: Նա, սակայն, Կենտրոնական ընտրական հանձնաժողովում որպես դիտորդ գրանցված չի եղել:
Մինչեւ Երեւանի քաղաքապետարանի հանրակրթության վարչության պետի պաշտոնում նշանակվելը Աննա Ստեփանյանը Սիամանթոյի անվան համար 162 դպրոցի տնօրենն էր:
Քաղաքապետարանում հանրակրթության վարչության պետի պաշտոնը թափուր էր երեկվանից: Արդեն նախկին պետ Գայանե Սողոմոնյանը, ինչպես հայտարարվել էր, աշխատանքից ազատվել էր սեփական դիմումի համաձայն: Նա Վերահսկիչ պալատի նախկին նախագահ, «Ծառուկյան» դաշինքով ընտրված պատգամավոր Իշխան Զաքարյանի կինն է»:
Առավել մանրամասն՝ թերթի այսօրվա համարում
