«Հրապարակ» թերթը գրում է. «Երեկ սեփական դիմումի համաձայն աշխատանքից ազատվել է Երեւանի քաղաքապետարանի կրթության վարչության պետ Գայանե Սողոմոնյանը: Սա անակնկալ էր ոչ միայն համակարգի, այլեւ նրա մտերիմների համար, որոնք պնդում են, որ վարչության պետը, որը 2009-ից զբաղեցնում է այս պաշտոնը, հրաժարական տալու մտադրություն չուներ, թեեւ ընտրությունների նախօրեին կասեցրել էր անդամությունը ՀՀԿ-ին:
Եվ չնայած վերջին շրջանում նկատելի հակասություններ չուներ Տարոն Մարգարյանի հետ, սակայն նրա հեռացումը վերագրում են քաղաքապետի վերաբերմունքին, ում վերընտրվելուց հետո քարտ-բլանշ են տվել՝ ցանկացած կադրային փոփոխություն անելու: Մյուսները կատարվածը հակված են բացատրելու գլոբալ քաղաքական խաղերով՝ Սողոմոնյանի ամուսնու՝ Իշխան Զաքարյանի հրաժարականով, Գագիկ Ծառուկյանի հետ նրա ունեցած խնդիրներով, եւ կարծում են, որ Զաքարյանի՝ պաշտոնից դուրս գալը թուլացրեց նաեւ նրա կնոջ դիրքերը:
Սակայն լուրեր կան, որ կրթության վարչությունը վերակազմավորվելու է բաժնի, եւ չի բացառվում, որ Սողոմոնյանն այլ աշխատանքի կանցնի: Տեղեկացանք, որ այսօր արդեն Տարոն Մարգարյանը նոր պետ կնշանակի, որի անունն առայժմ գաղտնի է պահվում»։
Առավել մանրամասն՝ թերթի այսօրվա համարում
