Միացյալ Նահանգների նախագահ Բարաք Օբաման երկրի ղեկավարի պաշտոնը լքելուց 2 օր առաջ 500 մլն դոլար է փոխանցել ՄԱԿ-ի Կանաչ կլիմայի հիմնադրամին (Green Climate Fund), որը պայքարում է գլոբալ տաքացման երևույթի դեմ:
Ինչպես հայտնում է The Guardian-ը, հիմնադրամը ստեղծվել է 2010թ. և ֆինանսավորվում է զարգացած, զարգացող պետությունների կողմից:
Հայտնի է, որ ԱՄՆ-ն պարտավորվել էր 3 մլրդ դոլար փոխանցել հիմնադրամին: Օբամայի կառավարման օրոք փոխանցվել է 1 մլրդ-ը, մինչդեռ մնացած 2 մլրդ դոլարը, որը պետք է հիմնադրամին հատկացվեր նորընտիր նախագահ Դոնալդ Թրամփի օրոք, չի փոխանցվելու: Բրիտանական պարբերականը մանրամասնում է, որ 70-ամյա հանրապետականը չի պատրաստվում միլիարդներ տրամադրել գլոբալ տաքացման դեմ պայքարին:
Այս կապակցությամբ բազմաթիվ բնապահպանական կազմակերպություններ ու տասնյակ հազարավոր ակտիվիստներ համախմբվել են՝ կոչ անելով Օբամային մինչև հեռանալը մնացած գումարը փոխանցել Կանաչ կլիմայի հիմնադրամին: