Կառավարության այսօրվա նիստի սկզբում վարչապետ Կարեն Կարապետյանը Պետական եկամուտների կոմիտեի նախագահ Վարդան Հարությունյանից հետաքրքրվեց, թե տոնավաճառների առևտրականների բողոքի հարցով ի՞նչ տեղեկություն կարող է տրամադրել կառավարությանը: Կարապետյանն ասաց, թե գիտի, որ Հարությունյանը բողոքի ակցիայի մասնակիցների հետ հանդիպել է:
Վարդան Հարությունյանը նշեց, որ ՊԵԿ-ի կողմից տոնավաճառներում իրականացվող հսկողական աշխատանքերը կրել են զուտ նախազգուշացման բնույթ, և որևէ տնտեսվարող մինչև հիմա չի տուգանվել: «Տոնավաճառ կազմակերպողները սկսած նոյեմբեր ամսից պարբերաբար զգուշացվել են, որ պետք է հստակեցնեն փաստաթղթաշրջանառությունը և ՀԴՄ-ների կտրոնների տրամադրումը: Արդյունքում՝ դրական միտում կա, միջին ու փոքր բիզնեսը հասկացել է, որ այդ ամենն ուղղված չէ իրենց դեմ, այլ ուղղված է խոշոր բիզնեսի կողմից շրջանառությունն ավելի հստակեցնելուն»,- ասաց Վարդան Հարությունյանը:
Ըստ նրա՝ կազմվել է համատեղ աշխատանքային խումբ, ՊԵԿ-ն սպասում է, որ մի քանի օրվա ընթացքում առևտրականների կողմից պետք է ներկայացվեն առաջարկություններ՝ համատեղ քննարկման համար: «Շատ հստակ էդ շարունակում եք: Մեր քաղաքականությունը հետևյալն է՝ փոքր ու միջին բինզնեսի բեռը չի ավելանալու: Բայց փոքր ու միջին բիզնեսը հաշվառելով, իրա բեռը չավելացնելով, մենք պետք է հասկանանք, որ բոլոր խոշոր բիզնեսի շրջանառությունը և հաշվառումը ունենալու ենք: Պետք է պարզ իրենց հետ խոսենք, պարզ խոսելու ժամանակ իրենք ամեն ինչ հասկանալու են»,-եզրափակեց վարչապետը: