Թուրքիան սահմանադրական փոփոխությոններից հետո դառնում է վատ իմաստով արևելյան բռնապետություն։ Այս մասին այսօր՝ ապրիլի 24-ին, Ծիծեռնակաբերդում լրագրողների հետ զրույցում նշել է ՀՀ ԱԳ նախարարի տեղակալ Շավարշ Քոչարյանը՝ անդրադառնալով Թուրքիայում տեղի ունեցած սահմանադրական փոփոխություններին, որով երկիրն անցում կատարեց կառավարման նախագահական համակարգի։
Հարցին, թե դրանից հետո ինչ կարող ենք ակնկալել հայկական հարցի լուծման հարցում, Շավարշ Քոչարյանը պատասխանել է. «Այդ ֆուտբոլային դիվանագիտությունը, ասում ենք, լակմուսային փաստաթուղթ էր, որը ցույց էր տալիս՝ արդյոք Թուրքիան իսկապես ցանկանում էր գնալ Եվրամիություն, թե Թուրքիայի նպատակը լրիվ այլ է։ Եվ ընդհանրապես պատահական չէ, որ Թուրքայում փոփոխությունները, որոնք տեղի ունեցան, համընկան նաև այն գործընթացներին, որոնք կապված էին ԵՄ-ի հետ համագործակցության հետ, եւ մերժումը հենց այդ քաղաքականության Էրդողանի կողմից նշանակում է՝ այդ երկիրը հեռանում է Եվրոպայից, այդ երկիրը գնում է բռնապետություն, և սահմանադրական այս հանրաքվեն հենց այդ վերջին քայլն էր»։
