Իսպանիայի առաջնության 33-րդ տուրում Մադրիդի «Ռեալը» սեփական հարկի տակ ընդունել է կատալոնական «Բարսելոնային»:
28-րդ րոպեին Տեր Շտեգենի պաշտպանած դարպասի ձողից գնդակն անդրադարձավ, իսկ Կազեմիրոն այն ուղարկեց դարպասը:
5 րոպե անց Լիոնել Մեսսին լավ անցումից հետո գնդակն ուղարկեց Կեյլոր Նավասի դարպասը՝ հավասարեցնելով հաշիվը:
Առաջին խաղակեսի ավելացված րոպեին Մեսսին գոլ խփելու հնարավորություն ուներ, սակայն վրիպեց:
Երկրորդ կեսում էլ գոլ խփելու լավ հնարավորություն ուներ Ռոնալդուն, սակայն առաջ անցան կատալոնացիները:
73-րդ րոպեին Ռակիտիչը ֆանտաստիկ հարվածով գնդակն ուղարկեց դարպասը:
4 րոպե անց Սերխիո Ռամոսը սահընկման համար կարմիր քարտ ստացավ:
«Արքայական» ակումբը 10 ֆուտբոլիստներով կարողացավ հավասարեցնել հաշիվը. խաղավարտից 5 րոպե առաջ Մարսելոյի փոխանցումից հետո փոխարինման մտած Խամես Ռոդրիգեսը գրավեց հյուրերի դարպասը:
90+2-րդ րոպեին ձախ եզրից փոխանցումից հետո Լիոնել Մեսսին հաշվենկատ հարվածով խփեց հաղթական գոլը:
Այս հաղթանակից հետո «Բարսելոնան» վաստակում է 75 միավոր և հավասարվում «Ռեալին», որը մեկ խաղ պակաս է անցկացրել:
